أكبر عقبة فى الشارع وأنت ماشى الأخ أبو جاكتة لمونى، اللى منصب نفسه حامى حمى الرصيف ومنقذ الشارع من الناس العشوائية اللى بتيحى ترمى عربياتها وتمشى، وهو لا حول له ولا قوة بيقعد يخبط كف على كف ويستعجب أمور الناس المهملة دى.
أنت منين ما تروح أى مكان معروف الرصيف ذو الألوان الأصفر والأسود ممنوع، والأبيض والأسود مسموح تركن فيها بشكل لائق لا يعيق المرور فى الشارع. الشوارع دى بتاعة البلد يعنى بتاعة الناس، لا هى اتكتبت باسم أصحاب المحال المجاورة، ولا باسم أصحاب الشقق السكنية فى العقارات.
لكن الدين الجديد الذى أصبح يستشرى بين البوابين وأصحاب المحال، أن اللى قدامى حقى وغنيمتى ولازم أحافظ عليه، ويا نهار قوالب أسمنت وخوازيق حديد.
أنا شايفة الدولة الحقيقة بتجود فى الطرق والشوارع، وبتجتهد تعمل جراجات للناس فى الأماكن المزدحمة، صحيح الجراجات دى بفلوس، لكن نار الفلوس ولا جنة الراجل اللمونى. الناس دى بتستنزف أموالنا وبتزيدنا عشوائية.