لو خرجت الصبح بدرى تقدر تقول الطرق فاضية وإنجاز المشاوير والوصول لغايتنا أسهل، بس علشان فيه دورات مدارس، اتوبيسات وعربات خاصة وتاكسى بيستقلها الطلاب للمدارس وده غالباً من السادسة والنصف صباحاً، يعنى البدرى زحام.
ولا تقدر تتوقع السيولة المرورية بعد كده، يعنى من الثامنة وحتى العاشرة صباحاً لأن الموظفين وكل من يعمل بمؤسسة أو مكاتب هيكون فى الشارع. واستكمالاً للأزمة ناخد العصر وحتى وقت المغرب ودى قمة الهرجلة والزحمة.
طيب لو أنا عندى مشوار ومصالح ومواعيد مهمة أختار أنزل امتى من بيتى؟ حاولت أتخيل أن نزول فئات الشعب يكون بالتوالى مثلاً كى لا تتكدس الطرق، ولكن لا محالة، واكتشفت أن حتى فى تنظيم المرور والشارع الأمر يرجع لسلوكيات الناس.
ووجدت أن كل واحد ظن نفسه صاحب الشارع والأولية فى السير لا تتبع القواعد ولكن تتبع المزاجية. وأخيراً وليس آخراً، يظهر أنا كمان هستعمل أنانيتى بهمجية وأستعرض قواى وهمشى بمبدأ (ما توسع يا أبنى وسع شوف مين بيكلمك) علشان أقدر أعدى وأجتاز وأحقق ساعة الوصول.