كل سنة بكتب المقال ده بنفس العنوان بس محتوى مختلف، ماهى كل سنه أكيد مختلفة عما قبلها وتاليها.
السنة دى كانت غريبة قوى كلنا اتغيرنا وكأنها بالفعل بوابة زمن، لكن النقلة كانت إيه؟ وعلى فين؟ السنة دى لاحظت ازاى البنى ادم بقى يستغرب نفسه، وازاى بقى غير مبالٍ لا للأحوال ولا للبشر، ازاى ما بقاش فارق معاه أى شيء وكل شيء، بل أكثر من ذلك، شعور اعمل لآخرتك وكأنك تموت غداً أصبح شعور مستساغ أكثر من شعور اعمل لدنياك كأنك تعيش أبداً.
وأهم استخلاص كان أن كل شىء له بداية وله نهاية وإحنا طلعنا مجرد حلقات الوصل بما نحمله من حكايات وتفاصيل ترسمها أقدارنا، فتنال منا وننال منها، يسايرنا فيها الحظ مرة فنقوى ويعاندنا مرات فننكسر.
وبقالى كام سنه بكتب جملة (فلتحيا المفاجآت) زى اللازمة كده، ما كنتش أعرف أنها هتقرب منى شخصياً وبشكل متتالى وقوى. وطالما بنقول فى آخر السنة يعنى جبنا آخرها وخلصت، وعشنا أيامها بكل مافيها، فالحمد لله دائماً وأبداً.