ولازم تكون عارف أن لعبة السلم والتعبان اللى كنا بنلعبها واحنا صغار، احنا لسه بنلعبها، بس موش بالنرد والأزرار الملونة، احنا بنلعبها فى كل حاجة بنعيشها.
أحياناً مثلاً تبتدى حاجة وتفضل ماشى فيها عادى وأنت مطمئن تماماً، بس تلاقى حاجة تانية رجعتك تانى لنقطة البداية، مفهمتش مثلاً إن لسه ناقصك خبرة، ولازم تأهل نفسك أكتر من كده؟!
أحياناً مثلاً تلاقى سقف توقعاتك عمَّال يعلى معاك وكل شويه تنط أكتر لحد ما توصل له فتكمل، بس ممكن تنسى شوية تفصيلات صغيرة تهبدك تانى، فلازم تركز كويس المرة الجاية ومتفرحش أكتر من اللازم.
أحياناً مثلاً تتصرف بسطحية وتكون فاهم إنك تمام، وتلاقى نفسك زى ما بيتقال لبست فى الحيط، فتخسر مكانتك وتنتقل من مربعك إلى خارج اللعبة، فلا تستهين بعقول الآخرين وحاول تتخلى عن سذاجتك.
ومواقف كتير بتحصل بتخليك طالع نازل وأنت مستمر علشان الدنيا كل يوم بحال، بس أنت لازم تتعلم من الأحوال دى، موش كل مرة هيبقى لك فرصة جديدة ترمى فيها النرد، محدش هيقولك حظ أوفر فى المرة القادمة، أحياناً بيتقال انتهت اللعبة.
لأن الحياة مبتتلعبش زى اللعبة تبيكال، أقصد إنها لا تعتمد على الحظ فنفلت منها، ولا أمور غير مقصودة فنتغافل عن سخافتها، ولا أؤمن أبداً إنها محض صدف تصيبنا، لأن الصدف كلها بتطلع مهببة بصراحة، ولو معملناش حسابنا كويس فموش لصالحنا أبداً.
احنا بنلعب اللعبة دى بتصرفاتنا، يا بتطلعنا لفوق ونفوز بمكانتنا وسط الناس وأثرنا عليهم، ومرونتنا وصدقنا فى التعامل معهم،
يا بتنزلنا الأرض وتخسرنا حتى أن حد يفتكرنا.
فحافظ على توازنك،
ولا تتلاعب بالنرد لتأتى فقط بالوجه الذى يوافقك،
ولا تعتمد فى حياتك على الحظ، فالدنيا أبداً ما كانت حظوظ.