باختصار هنتكلم عن موضوع الكهربا فى بلدنا. باختصار سنتكلم عن الناس اللى عايشينها كده، ولا فارق معاهم ترشيد ولا تقنين، هو كل الحكاية يشوفوا العمود فين والسلك كام متر وكهربائى ابن حلال مصفى وتخلص الشغلانة والكهربا توصل والنور يشتغل وتبقى الحياة جميلة.
الناس دى لا عندها محصل فواتير، ولا عدادات من أصله، الناس دى عايشين عالة علينا نحن، من يلتزم بالمرافق بشكل رسمى ويرتضى بكافة المصروفات أثناء وبعد التمتع بالخدمة، سواء كانت كهرباء أو مياه أو غاز.
وتأتى المحليات فى حملات موسعة وتظبط كام مخالفة ويكون العقاب قطع السلك لحين عمل ما يسمى بالممارسة حاجة كده زى شد الفيشة، وهذا العمل لا ينفى التحميل العشوائى على أعمدة النور، هو فقط يعتبر تجميلاً لصفة السرقة، ويستمر الحال بلا حلول جذرية.
ويتمطع السادة المسئولون الآن ويقترحون بالإبلاغ عن حالات السرقة ورصد مكافآت للمُبلغ. نتمنى قبل إصدار التصريحات البراقة أن يراجع الجميع أوراقه والبيانات المقدمة إليه، أو على الأقل ينزل يمشى فى الشارع يرصد وبعدين يتكلم. نتمنى يكون القول قولاً سديداً.