خلود الصياد

أنا كاتبة وروائية مصرية شابة من محافظة الدقهلية، من مواليد 18 أكتوبر 2007. بدأت شغفي بالكتابة وأنا عندي 13 سنة، وكانت بدايتي بكتابة قصص قصيرة، وبعد كده طورت نفسي وبقيت بكتب روايات وأعمال أدبية متنوعة.

بتميز بأسلوب سرد بيجمع بين الواقعية والخيال، وبحاول دايمًا أكتب حاجات توصل للقارئ وتلمس إحساسه. اشتغلت على نفسي لحد ما بقى ليّا وجود في النشر الورقي والإلكتروني، وده شجعني أكمل وأطور من نفسي أكتر.

وأنا في التعليم الفني، المدرسة رشحتني لمسابقة ثقافية، والحمد لله حصلت على المركز الأول على مستوى المدرسة، وبعدها الأول على مستوى إدارة المنزلة التعليمية، وكمان الأول على مستوى الجمهورية، وده من أكتر الحاجات اللي فخورة بيها.

والدتي كانت أول حد يلاحظ موهبتي ويشجعني، وكمان طورت نفسي من خلال كورسات في أساسيات الكتابة تحت إشراف الكاتبة صفية الدمراني، ومع الوقت بقيت بكتب بشكل مستمر عشان أنمّي موهبتي أكتر.

بدأت مشواري بالمشاركة في كتب جماعية زي حديث الروح، وبعدها قدمت أعمال فردية زي رواية وعود كاذبة (الجزء الأول)، وكتاب في آخر الحكايات، وكمان أول عمل إلكتروني ليا كان قصة المقهى الأخير. وكمان كان ليا شرف إني أشارك في كذا لقاء صحفي دعموني جدًا في رحلتي.

طموحي إني أقدم أعمال روائية أكتر، وكمان نفسي أحول بعض قصصي لعروض مسرحية. وبشوف إن الموهبة مهمة، بس الأهم منها الثقة بالنفس والاستمرار في التطوير.

لعرض اللقاء الصحفي اضغط هنا

لعرض الفيديو التكريمي اضغط هنا